A nena que soñaba é un espectáculo de teatro foro. É dicir, participativo, arriscado. É un espectáculo que creamos entre todos, no que o público se converte en espectador-actor, onde entra e xoga con nós, soñando cunha realidade que nos gusta máis que a que vivimos.

A nosa nena soña con robots e coas ecuacións de Maxwell. Pero podería soñar con dirixir unha empresa. Ou con coches de carreiras. Ou con ser disc jockey en grandes festivais. Como eliximos a nosa profesión? Canto inflúe o xénero nesta elección? E que pasa coa maternidade unha vez que estamos traballando? A nosa nena perde a capacidade de soñar, e alí preguntámonos, público e elenco, que podemos facer por ela o resto.