FORO METROPOLITANO

O AUDITORIO do Fórum Metropolitano é unha sala de 350 m2 con capacidade para 300 espectadores, presenta unha gran versatilidade polas posibilidades de transformación que ofrece cun sistema de recollida de asentos, que permite modificar a capacidade e o espazo escénico.
Dotado de escenario (10m de ancho, 7m de fondo e 3,5m de alto), con acceso para persoas con mobilidade reducida; asentos móbiles, equipos de iluminación e son, aptos para pequenas producións; e 4 camerinos anexos.

Está situado no centro sociocultural denominado FORUM METROPOLITANO, que é un CENTRO DE SERVIZOS INTEGRADOS no que se ubican unidades que prestan servizos culturais e educativos (2 bibliotecas -infantil e adultos-, 2 cines, auditorio, Centro de Información xuvenil...) xunto cos espazos que prestan servizos autónomos (centro de actividades sociais) e servizos administrativos (Rexistro Municipal).
O centro é un equipamento municipal de xestión administrativa, cultural e de acción social, con incidencia no ámbito sociocultural e con carácter polivalente que integra unha pluralidade de servizos que buscan, por unha banda, cubrir as necesidades de persoas, familias e colectivos sociais da súa área de influencia (grupos veciñais) e da cidade, en xeral, facilitando a convivencia e interacción de persoas con diferentes procedencias, afeccións e intereses (integradora da diversidade). Neste sentido, desenvolve un Programa de Lecer para adultos (de outubro a decembro e de febreiro a xuño) e infantil (campamentos urbanos en verán e Nadal). E, por outra banda, promover a cooperación de asociacións e axentes interesados nunha mesma dinámica (integradora do tecido social).